Ýurdumyzyň zehinli mekdep okuwçylary Beýik Britaniýanyň we Demirgazyk Irlandiýanyň Birleşen Patyşalygynyň London şäherinde geçirilen «IWISE Global Final London 2026» halkara bäsleşiginde uly üstünlik gazanyp, 6 altyn we 4 kümüş medaly eýelediler. Olaryň bu ýeňşi Watanymyzyň ylym-bilim ulgamyndaky halkara abraýynyň artmagyna mynasyp goşant boldy.
Dünýä belli «IWISE» halkara bäsleşigi ýaşlaryň intellektual derejesini, innowasion pikirlenişini hem-de ylmy-döredijilik ukyp-başarnyklaryny ýüze çykarmaga we goldamaga gönükdirilendir. Bäsleşigiň esasy maksady zehinli ýaşlary bir ýere jemläp, olaryň arasynda tejribe alyşmagy ýola goýmakdan, STEM, iTECH, robototehnika, sungat hem-de dil ugurlary boýunça innowasion taslamalary we barlaglary höweslendirmekden ybaratdyr. Bäsleşik ýaş nesliň ekologiýa, tehnologiýa we jemgyýetçilik meselelerine döredijilikli hem-de ylmy taýdan çemeleşip, durnukly çözgütleri hödürlemeklerine giň ýol açýar.
Abraýly bäsleşikde Türkmenistanyň ýygyndy toparyna saýlanan 10 okuwça Arkadag şäherindäki 1-nji ýöriteleşdirilen okuw-terbiýeçilik toplumynyň mugallymy M.Sähetgulyýew hem-de Aşgabat şäherindäki dil derslerini çuňlaşdyryp öwredýän ýöriteleşdirilen 97-nji orta mekdebiň mugallymy G.Baýramow ýolbaşçylyk etdiler. Bäsleşikde ýokary intellektual taýýarlygy görkezen okuwçylardan Aşgabat şäherindäki dil derslerini çuňlaşdyryp öwredýän ýöriteleşdirilen 97-nji orta mekdebiň okuwçylary Resulberdi Orazberdiýew, Salyh Kakalyýew, Resul Geldiýew, paýtagtymyzdaky 7-nji orta mekdebiň okuwçysy Selim Begmuradow hem-de dil derslerini çuňlaşdyryp öwredýän ýöriteleşdirilen 87-nji orta mekdebiň okuwçysy Nurmyrat Kulow dagy altyn medala hem-de pul baýragyna mynasyp boldy. Şeýle-de Türkmenistanyň Goranmak ministrliginiň Berdimuhamet Annaýew adyndaky 1-nji ýöriteleşdirilen harby mekdebiň okuwçysy Mälikmyrat Annamuradow altyn medaly eýelemegi başardy. Bäsleşikde 97-nji orta mekdebiň okuwçysy Salyh Altyýew, Aşgabat şäherindäki 13-nji orta mekdebiň okuwçysy Rozymyrat Ýagşymyradow, Arkadag şäherindäki iňlis dili dersine ýöriteleşdirilen 2-nji hem-de 3-nji orta mekdepleriň okuwçylary Ebubekir Berdiýew, Umyt Atamyradow dagy bolsa kümüş medallary eýeledi. Mekdep okuwçylarymyzyň gazanan bu uly ýeňşi ýurdumyzyň beýik geljegini gurujy zehinli nesilleriň ýetişýändigi baradaky buýsançly hakykatyň nobatdaky subutnamasyna öwrüldi.
Ýaş matematikleriň halkara üstünligi
Ýurdumyzda ýaş nesliň döwrebap bilim almagy, ylmy gözlegler bilen meşgullanmagy hem-de halkara bäsleşiklerde ukyp-başarnygyny görkezmegi üçin giň mümkinçilikler döredilýär. Ýakynda ýurdumyzyň talyplarynyň Bolgariýa Respublikasynyň Blagoýewgrad şäherinde geçirilen 33-nji halkara matematika olimpiadasynda (IMC-2026) ajaýyp üstünlik gazanyp, 6 altyn we 3 kümüş medala mynasyp bolmaklary munuň aýdyň güwäsine öwrüldi.
London uniwersitet kolleji we Bolgariýadaky amerikan uniwersiteti tarapyndan guralan bäsleşige dünýäniň 47 döwletinden 450-ä golaý zehinli talyp gatnaşdy. Iňlis dilinde iki tapgyrda geçirilen bäsleşikde talyplara matematiki seljerme, çyzykly we abstrakt algebra, funksional seljerme, analitiki geometriýa, kombinatorika hem-de sanlar nazaryýeti boýunça çylşyrymly meseleler hödürlenildi. Onuň netijesi boýunça Magtymguly adyndaky Türkmen döwlet uniwersitetiniň talyby Emir Wellekow, Halkara ynsanperwer ylymlary we ösüş uniwersitetiniň talyby Kerim Toýlyýew, Türkmen döwlet binagärlik-gurluşyk institutynyň talyby Batyr Öwezmyradow, Türkmenistanyň Döwlet energetika institutynyň talyplary Nurmuhammet Goçyýew bilen Mergen Meredow, Türkmen döwlet ykdysadyýet we dolandyryş institutynyň talyby Medetberdi Taňryberdiýew dagy altyn medallara mynasyp boldy. Şeýle hem Seýitnazar Seýdi adyndaky Türkmen döwlet mugallymçylyk institutynyň talyby Gurtgeldi Hanow, Türkmenistanyň Döwlet energetika institutynyň talyplary Kakageldi Muhammetamanow, Tahyr Ýoldaşow dagy bolsa kümüş medaly eýelemegi başardy.
1994-nji ýyldan bäri geçirilip gelinýän IMC bäsleşigi dünýäniň iň abraýly olimpiadalarynyň biri hasaplanýar. Matematika ylmy häzirki zaman tehnologiýalarynyň, emeli aňyň we sanly ykdysadyýetiň binýadydyr. Şol sebäpli bu ugurda gazanylýan her bir üstünlik geljekde ýurdumyzyň ylmy-tehnologik kuwwatynyň has-da ýokarlanmagyna ýardam edýär.
Maksatmyrat ÇARYÝEW.
«Türkmenistan».