— Halk Maslahatynyň her ýylky mejlisinde göreldeli hyzmatlary, il arasynda ýagşy işleri bilen belent abraýa eýe bolan ýaşululara «Hormatly il ýaşulusy» diýen adyň dakylmagy ýaşuly nesliň wekillerine goýulýan belent hormat-sarpany görkezýär. Mukaddes Garaşsyzlygymyzyň 35 ýyllyk şanly toýunyň bosagasynda ak mermerli paýtagtymyzda geçirilen ählihalk geňeşinde şeýle hormatly ada mynasyp bolanlaryň arasynda özümiň hem bolmagym göwnümi ganatlandyrdy. Bu sylagy hormatly Prezidentimiziň hut özüniň gowşurmagy şatlygymy has-da artdyrdy.
Halal zähmet çekseň, ýurduň ösüşine goşant goşsaň, sarpaly bolýarsyň. Özüm-ä ömrümiň agramly bölegini oba hojalyk işlerinde geçirdim. Köp ýyllap etrabymyzdaky «Yzgant» daýhan birleşiginde zähmet çekdim. Gowaça-da, bugdaý-da ýetişdirdim, suwçy bolup hem işledim. Oba hojalyk işlerinde baý tejribe topladym. 17 ýyla golaý Bekrewe tokaý hojalygynda zähmet çekip, şol ýerden hem hormatly dynç alşa çykdym. Tokaý hojalygynda işlän ýyllarymda Diýarymyzy bagy-bossanlyga öwürmek, şäherdir şäherçelerimiziň, obalarymyzyň, giň ýaýlalarymyzyň owadan tebigatyny goramak bilen bagly asylly işlerde yhlasymy gaýgyrmadym. Bu gün bolsa döwletli ojagyma, üç gyz we ogul perzendimiň, 14 agtygymyň bagtyna guwanyp, Watanymyzyň ösüşlerine buýsanyp ýaşaýaryn.
Hormatly dynç alyşda bolsamam, ýaşlar bilen wagyz-nesihat çärelerine işjeň gatnaşýaryn, olara watançylyk, zähmetsöýerlik, päk ahlaklylyk, halallyk, ynsanperwerlik bilen bagly öwüt-ündewlerimi berýärin. Watanymyzyň baş baýramynyň öňüsyrasynda Şa serpaýy bilen sylaglandygy üçin Arkadagly Gahryman Serdarymyza, Gahryman Arkadagymyza zyýada ömür, berk jan saglyk, egsilmez güýç-kuwwat arzuw edýärin.
Amantäç BAGYÝEWA,
Balkanabat şäherindäki çagalar we ýetginjekler döredijilik öýüniň çeper bezegçisi, «Zenan kalby» ordeniniň eýesi