Ýurdumyzyň öňdebaryjy agrar ýokary okuw mekdebi ählumumy ylym-bilim giňişligine goşulmagyň täze derejesine çykýar. Hepdäniň anna güni geçirilen Ministrler Kabinetiniň mejlisinde S.A.Nyýazow adyndaky Türkmen oba hojalyk uniwersiteti tarapyndan neşir ediljek «Türkmenistanda agroinnowasiýa» atly ylmy-amaly elektron žurnalyny esaslandyrmak baradaky teklip makullandy. Täze sanly taslama öňdebaryjy tejribäni ornaşdyrmaga, ýaş alymlaryň düýpli ylmy barlaglarynyň netijelerini wagyz etmäge hem-de ýurdumyzyň agrosenagat toplumynda tehnologik ugurlary işjeňleşdirmäge gönükdirilendir.
Täze elektron neşir halkara derejesine eýe bolup, ol türkmen, iňlis we rus dillerinde çap ediler. Bu bolsa türkmen hünärmenleri bilen daşary ýurtly bilermenleriň arasynda tejribe alyşmak üçin netijeli gepleşik meýdançasyny döretmäge mümkinçilik berer. Žurnalyň sahypalarynda häzirki zaman oba hojalygynyň esesasy ugurlary boýunça ýöriteleşýän professorlaryň, mugallymlaryň, doktorantlaryň we talyplaryň innowasion makalalaryny we seljerme materiallaryny çap etmek meýilleşdirilýär.
Çap ediljek makalalaryň tematikalary pudagyň iň köp isleg bildirilýän we ýokary tehnologiýaly ugurlaryny öz içine alar. Awtorlaryň üns merkezinde takyk we sanly ekerançylyk meseleleri, agrosenagat toplumynyň önümçiligine ýokary tehnologiýalary ornaşdyrmak, häzirki zaman agronomiýasy, agroekologiýa hem-de suwdan rejeli peýdalanmak şertlerinde gidromeliorasiýa ýaly meseleler bolar.
Şu başlangyjy makullap, Hormatly Prezidentimiz Serdar Berdimuhamedow ýokary derejeli hünärmenleri taýýarlamaga we amaly ylymyň netijeligini ýokarlandyrmaga döwletimiz tarapyndan mundan beýläk-de hemmetaraplaýyn goldaw beriljekdigini nygtady we degişli wise-premýere bu platformany işe girizmek boýunça anyk tabşyryklary berdi.