Bu gün asuda ýurdumyzyň ähli umumybilim berýän orta mekdeplerinde geçirilýän «Soňky jaň» dabaralarynyň joşguny dag aşyp, aýdym-sazyň owazy belentden ýaňlanýar. Bu şatlykly baýramçylygyň Aşgabat şäheriniň güni bilen bilelikde bellenilmegi oňa özboluşly öwüşgin çaýýar. «Garaşsyz, baky Bitarap Türkmenistan — bedew batly at-myradyň mekany» ýyly şygary astynda geçýän ýylymyzyň «Soňky jaň» dabaralary her bir adama joşguna, şatlyga ýugrulan mekdep ýyllaryny ýatladýar. Ol, aýratyn-da, uçurymlar üçin tolgundyryjy pursatdyr. Hormatly Prezidentimiz okuw ýylynyň tamamlanmagy mynasybetli Türkmenistanyň mekdepleriniň uçurymlaryna, mugallymlaryna we ähli bilim işgärlerine Gutlag iberdi.
Bilim ministrliginiň berýän maglumatyna görä, şu okuw ýylynda Aşgabat şäheri boýunça uçurymlaryň 12 müň 851-si, Arkadag şäheri boýunça 237-si mekdep bilen hoşlaşýar. Ahal welaýaty boýunça 14 müň 337, Balkan welaýaty boýunça 8 müň 680, Daşoguz welaýaty boýunça 23 müň 798, Lebap welaýaty boýunça 23 müň 700-e golaý, Mary welaýaty boýunça 25 müňden gowrak okuwçy mekdebi tamamlap, uly durmuşa gadam basýar. 2025-2026-njy okuw ýylynyň tamamlanmagy hem-de Aşgabat şäheriniň güni mynasybetli Garaşsyzlyk binasyna, Gökdepe etrabynyň Yzgant şäherçesindäki 27-nji orta mekdepde Berdimuhamet Annaýewiň heýkeline, şeýle-de Balkan, Daşoguz, Lebap, Mary welaýatlarynyň Baş baýdak meýdançalaryna gül goýmak dabaralary guralýar.
Tamamlanan okuw ýylynda ýurdumyzyň mekdep okuwçylary halkara ders, taslama, internet hem-de «Altyn asyryň altyn zehinleri» döwlet bäsleşigine gatnaşyp, altyn, kümüş, bürünç medallaryň ençemesine mynasyp boldular. «Altyn asyryň altyn zehinleri» ders bäsleşiginde paýtagtly okuwçylaryň 64-si baýrakly orunlary eýeledi. Mekdep okuwçylarynyň arasynda geçirilen III Halkara matematika olimpiadasynda 21 okuwçy ýeňiji boldy. Gazanylan medallaryň 6-sy altyn, 8-si kümüş, 7-si bürünç medallardyr.
Okuw ýylynyň tamamlanyp barýan günlerinde aşgabatly okuwçylar Gresiýanyň Saloniki şäherinde geçirilen 43-nji Balkan matematika olimpiadasynda hem üstünlikli çykyş edip, hoş habar bilen hemmeleri begendirdiler. Şonda Aşgabat şäherindäki ýöriteleşdirilen 13-nji orta mekdebiň matematika mugallymy Pälwan Agamyradowyň ýolbaşçylygynda paýtagtymyzdaky ýöriteleşdirilen 86-njy orta mekdebiň okuwçysy Mälikşa Meýlismyradow altyn medala mynasyp boldy. Ýöriteleşdirilen 49-njy orta mekdebiň okuwçysy Söýünmuhammet Geldimämmedow kümüş medala, ýöriteleşdirilen 86-njy orta mekdebiň okuwçysy Hemra Gurbanow hem-de ýöriteleşdirilen 49-njy orta mekdebiň okuwçylary Ýunus Orazow we Begenç Akmyradow bürünç medallara mynasyp boldular.
Okuw ýylynyň dowamynda Türkmenistanyň Kärdeşler arkalaşyklarynyň Aşgabat şäher geňeşi bilen bilelikde umumybilim edaralarynyň pedagogik işgärleriniň gatnaşmagynda «Ýylyň mugallymy — 2026», «Ýylyň terbiýeçisi — 2026» bäsleşikleriniň etrap, şäher hem-de döwlet tapgyrlarynyň geçirilendigini aýtmalydyrys. Şonuň ýaly-da, «Iň gowy orta mekdep», «Iň gowy mekdepden daşary çagalar edarasy», «Iň gowy mekdep sport zaly», «Iň gowy mekdep kitaphanasy», «Iň gowy okuw otagy», «Iň göreldeli mekdep müdiri», «Mekdep müdiriniň iň göreldeli okuw-terbiýeçilik işleri boýunça orunbasary», «Iň göreldeli synp ýolbaşçysy», «Iň göreldeli gurnak ýolbaşçysy» bäsleşikleriniň döwlet tapgyry geçirildi. Olarda öz işleriniň ussady bolan bilim işgärleri aýratyn tapawutlandylar.
Üstünlikli jemlenen okuw ýyly bilim işgärleri, şol sanda mugallymlar tarapyndan ýadawsyz işler amal edilen ýyllaryň biri boldy. Mekdep okuwçylary täze, döwrebap bilimleri özleşdirdiler. Ähli amatlyklary bolan ak mekdeplerde, çagalar baglarynda, sagaldyş we dynç alyş merkezlerinde işleriň oňat ýola goýlandygy hem begendirýär. Aşgabatdaky hem-de welaýatlardaky orta mekdeplerde ýaş nesle bilim berýän halypa mugallymlaryň iş tejribesi öwrenilýär we halypa-şägirtlik ýörelgesi üstünlikli dowam etdirilýär. Munuň özi ýaşlaryň dünýä derejesinde bilim almagyna, ýylsaýyn kämilleşmegine ýardam berýär.
Ösüp gelýän ýaş nesiller Gahryman Arkadagymyzyň hem-de hormatly Prezidentimiziň aladalary bilen gurşalandyr. Olar üçin ýurdumyzda sazlaşykly ösmäge ýardam berýän ähli şertler döredilýär. Döwlet Baştutanymyzyň yzygiderli tagallasy bilen ýurdumyzda täze ýokary okuw we orta mekdepler açylyp, täze hünärler girizilýär. Bu bolsa mekdebi tamamlaýan uçurymlara dürli ugurlar boýunça bilimini artdyrmaga mümkinçilik berýär. Ýurdumyzyň ýaşlarynyň ylymly, bilimli, kämil hünärmenler bolup ýetişmekleri ugrunda köp işleriň amal edilýändigini bellemek ýakymlydyr. Ýaşlara diňe bir ýurdumyzda däl-de, eýsem, dünýäniň abraýly ýokary okuw mekdeplerinde-de bilim almaga giň ýollar açylýar.
Adatça bolşy ýaly, orta mekdepleriň uçurymlarynyň «Soňky jaň» dabaralary ýurdumyzyň welaýat merkezlerinde hem-de paýtagtymyz Aşgabatda, Arkadag şäherinde aýdym-sazlara beslenýär. Agşam bolsa paýtagtymyzdaky «Aşgabat» aýdym-saz merkezinde Türkmenistanyň Bilim we Medeniýet ministrlikleriniň, Magtymguly adyndaky Ýaşlar guramasynyň Merkezi geňeşiniň bilelikde guramagynda medeniýet we sungat ussatlarynyň baýramçylyk konserti köplere lezzet paýlar.
Täze belent sepgitlere ýetmek üçin öňde uly synag döwri bar. Ine, sanlyja wagtdan gutardyş synaglaryny üstünlikli tamamlan uçurymlar ak mekdebiň mugallymlaryndan ak pata alyp, durmuşyň ak ýoluna gadam basarlar. Ýaşlara Watanymyzy gülledip ösdürmekde uly işler garaşýar. Watanyň wepaly ogul-gyzlary bolmak, oňa ak ýürekden hyzmat etmek uly bagtdyr.
Sona DURDYÝEWA.
«Türkmenistan».