Ylym-bilim hemişe ösüşiň, özgerişiň we täze mümkinçilikleriň esasy çeşmesi hasaplanylýar. Berkarar döwletiň täze eýýamynyň Galkynyşy döwründe bu hakykat has-da aýdyň ýüze çykýar. Ýurdumyzyň ylym-bilim ulgamynda Gahryman Arkadagymyzyň başyny başlan beýik işleri Arkadagly Gahryman Serdarymyz tarapyndan mynasyp dowam etdirilýär. Bu özgertmeleriň özeninde döwletimiziň ýaş nesle döwrebap bilim bermek, olary milli ruhda terbiýelemek, sagdyn we giň dünýägaraýyşly şahsyýetler edip ýetişdirmek baradaky aladalary durýar.
Bilim ulgamynyň maddy-enjamlaýyn binýadynyň berkidilmegi, täze döwrebap mekdepleriň we çagalar baglarynyň gurlup ulanmaga berilmegi, okuw otaglarynyň häzirki zaman tehnologiýalary bilen üpjün edilmegi bu ugurda alnyp barylýan işiň netijeli häsiýete eýedigini görkezýär. Sanly tehnologiýalaryň okuw-terbiýeçilik işine giňden ornaşdyrylmagy bilim bermegiň mazmunyny täze derejä çykarýar. Bu babatda Arkadag şäheriniň bilim ulgamynda alnyp barylýan işler aýratyn guwandyryjydyr. Gahryman Arkadagymyzyň ýakynda şähere amala aşyran iş saparynyň dowamynda bu ýerde täze mekdebiň, çagalar bagynyň hem-de sport toplumynyň şekil taslamalarynyň görnüşleri bilen tanşyp, bu binalar toplumynyň ýokary derejede enjamlaşdyrylmalydygyny, lingafon we beýleki okuw otaglarynyň halkara görkezijilere laýyk gelmelidigini bellemegi bilim işgärleriniň öňünde täze wezipeleri goýdy.
«Akylly» şäheriň bilim edaralarynda ýaş nesliň ýokary hilli bilim almagy, döredijilik başarnyklaryny ösdürmegi, döwrebap tehnologiýalardan netijeli peýdalanmagy üçin ähli mümkinçilikler bar. Şäheriň orta mekdeplerinde täze okuw ýylyna guramaçylykly girişmek boýunça taýýarlyk işleri hem ýokary derejede geçirildi. Bilim edaralarynyň okuw kitaplary, okuw-usuly gollanmalar bilen üpjün edilmegine, olaryň aýawly saklanylmagyna, «e-Mekdep» elektron bilim dolandyryş ulgamynyň kämil derejede ulanylmagyna, maglumat-aragatnaşyk ulgamlarynyň howpsuzlygyny üpjün etmek meselelerine aýratyn üns berilýär.
Bosagadaky 2026 — 2027-nji okuw ýylynda Arkadag şäherinde 600-den gowrak çaganyň birinji synpa okuwa başlamagyna garaşylýar. Olaryň ilkinji ädimleriniň şatlykly we ýatda galyjy bolmagy üçin ähli zerur şertler döredilýär. Birinji synpy okatjak mugallymlar bilen okuwçylaryň ýaş aýratynlyklary, okatmagyň döwrebap usullary we kompýuter sowatlylygyny ýokarlandyrmak boýunça ýörite okuwlaryň geçirilmegi hem bu işe jogapkärçilikli çemeleşilýändigini görkezýär. Şeýle hem ilkinji gezek mekdep partasyna geçjek körpelere hormatly Prezidentimiziň adyndan sowgat beriljek noutbuk kompýuterleriniň taýýarlanylmagy ýaş nesle bildirilýän belent ynamyň aýdyň nyşanydyr.
Arkadag şäherinde bilim ulgamynda gazanylýan üstünlikler diňe bir döredilen şertler bilen çäklenmeýär. Şäheriň okuwçylarynyň dürli derejedäki ýerli we halkara bäsleşiklerde gazanýan netijeleri hem ýokarydyr. «Robototehnika» bilim merkeziniň okuwçylarynyň Dubaýda, Londonda geçirilen halkara bäsleşiklerde bürünç hem-de kümüş medallara mynasyp bolmagy, «Altyn asyryň altyn zehinleri» atly döwlet ders hem-de ylmy-döredijilik (taslama) bäsleşiginiň jemleýji tapgyrynda 7 sany baýrakly ornuň eýelenmegi, ýokary okuw mekdepleriniň olimpiadalarynda üstünlik gazanylmagy guwandyryjy netijelerdir. Okuwçylaryň döredijilik, dil, tehniki ugurlardaky bäsleşiklerde hem öňe saýlanýandyklaryny bellemek gerek. «Parahatçylyk: çagalaryň sesi», «Ýol hereketiniň ýaş gözegçileri», «Hünärli nesil — röwşen geljek», «Iň eýjejik gyzjagaz — 2026», «Garaşsyzlygyň merjen däneleri» ýaly bäsleşiklerde gazanylan baýrakly orunlar ýaşlaryň zehininiň dürli ugurlarda ýüze çykýandygyny görkezýär. «Kitap okamaýan görýänini görer, kitap okaýan dünýäni görer» atly kitap okamak, «Arşyň nepisligi — türkmen halysy» atly haly dokamak bäsleşigi we onuň çäginde ýaýbaňlandyrylan sergi-ýarmarka, «Mekdepler futbol bilen birleşýär, dostluk bilen güýçlenýär!» atly futbol ýaryşy hem-de festiwal «akylly» şäheriň mekdep okuwçylarynyň ukyp-başarnyklaryny açyp görkezmekleri üçin özboluşly meýdança öwrüldi.
Bilim ulgamynda mugallymyň ornuna aýratyn ähmiýet berilýär. Häzirki döwrüň mugallymy diňe bir öz dersini kämil bilýän hünärmen bolman, eýsem, sanly tehnologiýalardan baş çykarýan, täzeçe pikirlenýän, okuwçynyň döredijilik başarnyklaryny ýüze çykarmaga ukyply, milli we dünýä tejribesini utgaşdyryp bilýän pedagog bolmalydyr. Şonuň üçin bilim işgärleriniň hünär derejesini yzygiderli ýokarlandyrmak, ýaş mugallymlara tejribeli halypalaryň göreldesini ýetirmek möhümdir.
Ýakynda Arkadag şäheriniň iňlis dili dersine ýöriteleşdirilen 4-nji orta mekdebinde geçirilen öňdebaryjy pedagogik işgärleriň awgust maslahaty hem şu maksatlara gönükdirildi. Onda täze okuw ýylynda öňde durýan wezipeler, okatmagyň döwrebap usullary, sanly bilimiň mümkinçilikleri, zehinli okuwçylar bilen işleşmek, halypa-şägirtlik gatnaşyklaryny ösdürmek ýaly meseleler giňden ara alnyp maslahatlaşyldy. Maslahatda milli terbiýe bilen bilim bermegiň häzirki zaman usullarynyň sazlaşygyna hem aýratyn üns berildi. Şunuň bilen baglylykda, Arkadag şäheriniň bilim işgärleriniň öňünde zehinli okuwçylary ýüze çykarmak, olaryň halkara olimpiadalara, ylmy we döredijilik bäsleşiklerine gatnaşygyny artdyrmak, daşary ýurt dillerini öwrenmäge höwesini güýçlendirmek, sanly tehnologiýalardan netijeli hem howpsuz peýdalanmak endiklerini ösdürmek ýaly möhüm wezipeler dur.
Şäherimiziň bilim ulgamynda gazanylýan üstünlikleriň ýene bir möhüm çeşmesi mugallymlaryň yhlasly zähmetidir. Bilim işgärleriniň döwlet derejesindäki bäsleşiklerde baýrakly orunlara mynasyp bolmagy, olaryň birnäçesiniň 2025 — 2026-njy okuw ýylynda «Zenan kalby» ordeni, «Watana bolan söýgüsi üçin» medaly hem-de «Türkmenistanyň hemişelik Bitaraplygynyň 30 ýyllygy» atly ýadygärlik nyşany bilen sylaglanylmagy halal zähmete berilýän ýokary bahanyň güwäsidir.
Ýeri gelende bellesek, täze okuw ýylyna taýýarlyk görmegiň çäklerinde Arkadag şäheriniň bilim edaralarynda mukaddes Garaşsyzlygymyzyň şanly 35 ýyllyk toýuna we Halk Maslahatynyň mejlisine bagyşlanan wagyz-nesihat çäreleri, «tegelek stol» duşuşyklary, jemgyýetçilik-syýasy söhbetdeşlikler hem yzygiderli guralýar. Bu çäreleriň esasy maksady ýaş nesliň Watana bolan söýgüsini artdyrmakdan, olaryň aňynda «Garaşsyzlyk», «Bitaraplyk» ýaly mukaddes düşünjeleri kemala getirmekden ybaratdyr.
Täze nesli terbiýelemek döwletiň geljegini gurmakdyr. Ýaşlaryň giň gözýetimli, saýlap alan hünärinden ussatlyk bilen baş çykarýan şahsyýetler bolup kemala gelmegi üçin beýik işleri alyp barýan Gahryman Arkadagymyzyň hem-de Arkadagly Gahryman Serdarymyzyň janlary sag bolsun, il-ýurt bähbitli, umumadamzat ähmiýetli döwletli tutumlary hemişe rowaçlyklara beslensin!
Şirmuhammet BERDIÝEW,
Arkadag şäheriniň bilim müdirliginiň başlygynyň orunbasary.