Mälim bolşy ýaly, Hazaryň kenarynda geçirilýän BMG-niň Deňze çykalgasy bolmadyk ösüp barýan döwletler boýunça üçünji maslahatyny we onuň çäklerinde guralýan ugurdaş çäreleri ýokary guramaçylyk derejesinde geçirmek maksady bilen, ýurdumyzyň ýokary okuw mekdepleriniň talyp ýaşlaryndan we mugallymlaryndan düzülen meýletinçiler topary döredildi. Olar daşary ýurtly myhmanlara terjimeçilik, ýolbeletlik, maglumat goldawy ýaly dürli ugurlar boýunça hyzmat edýärler. Şeýle meýletinçiler toparynyň düzüminde birnäçe daşary ýurt dillerini bilýän talyp ýaşlaryň 300-den gowragy bellenilen ugurlar boýunça hereket edýär. Mundan başga-da, meýletinçiler bilen bir hatarda, ýaş wagyzçylaryň 20-den gowragy forumyň maglumat üpjünçiligine işjeň gatnaşýar. Biz hem şeýle asylly işe goşant goşýan ýaşlaryň käbiri bilen söhbetdeş bolup, olaryň ýürek buýsançlaryny okyjylarymyza ýetirýäris.

Jahansoltan AÝDOGDYÝEWA,

Döwletmämmet Azady adyndaky Türkmen milli dünýä dilleri institutynyň ispan dili mugallymy:

— Meýletinçilik işinde biz — türkmen ýaşlary örän baý tejribe topladyk. BMG-niň ýokary wekilçilikli bu maslahatynda hem öz tejribämizi, bilýän daşary ýurt dillerimizi has-da kämilleşdirmäge mümkinçilik aldyk. Şunda myhmanlaryň biz — meýletinçilere halklaryň medeni ilçileri hökmünde ýokary baha berýändigini nygtamagy örän buýsandyrýar. Talyplyk ýyllarymda BMG-niň resmi dilleriniň üçüsini — ispan, iňlis we rus dillerini öwrenmegim diňe dil bilimi tarapdan däl-de, eýsem, ähli babatda kämilleşmegime itergi berdi. Biz — ýaşlara şeýle giň mümkinçilikleri döredip berýän Gahryman Arkadagymyzyň hem-de Arkadagly Gahryman Serdarymyzyň janlary sag, belent başlary aman bolsun!

Hojamyrat BAÝLYÝEW,

Türkmenistanyň Daşary işler ministrliginiň Halkara gatnaşyklary institutynyň talyby:

— Bu halkara maslahata taýýarlygyň çäklerinde guralan ýörite okuw sapaklarynda halkara protokol, medeniýetara aragatnaşyk, maslahatlary dolandyrmak boýunça taýýarlyk derejämizi ýokarlandyrdyk. BMG-niň wekillerine kömekçi hökmünde saýlanmagym nazary bilimlerimi amaly taýdan berkitmäge oňyn mümkinçilik boldy. Şunda men iňlis, rus, nemes we türk dilleri boýunça myhmanlara hyzmat edýärin. Biz — ýaşlar Milli Liderimiziň hem-de hormatly Prezidentimiziň özümiz hakda edýän aladalaryny duýup ýaşaýarys. Bu maslahat bolsa ýurdumyzyň halkara abraýynyň barha ýokarlanýandygyny görkezýär.

Aýsoltan ABAÝEWA,

Türkmen döwlet medeniýet institutynyň talyby:

— Gahryman Arkadagymyzyň ýörite tabşyryklary hem-de hormatly Prezidentimiziň tagallalary esasynda meýletinçiler bilen ugurdaşlykda ýaş wagyzçylar topary döredildi. Biz milli we halkara habar beriş serişdeleriniň ähli görnüşlerinde bu maslahatyň ýokary ähmiýetini wagyz edýäris, maslahat barada dessin maglumatlary taýýarlaýarys. Türkmen ýaşlary tarapyndan reportažlardyr söhbetdeşlikleriň, makalalaryň birnäçe dilde ýaýradylmagy dünýä giňişliginde forum barada habarlylygy ýokarlandyrmakda uly ähmiýete eýe bolar.

«Nesil»

Çeşmesi: Turkmenmetbugat