Diýarymyzda tomusky dynç alyş möwsümine dabaraly badalga berildi
Körpe nesilleriň uly sabyrsyzlyk bilen garaşan tomusky dynç alyş möwsümi eziz Diýarymyzyň ähli künjeklerinde uly şatlyk-şowhun, baýramçylyk ruhy bilen başlandy. Tomus paslynyň gelmegi bilen, ýurdumyzyň döwrebap çagalar sagaldyş-dynç alyş merkezleri Watanymyzyň geljegi bolan körpeler üçin gapylaryny giňden açdylar. Düýn bolsa bütin ýurt derejesinde tomusky dynç alyş möwsüminiň ilkinji tapgyryna dabaraly badalga berildi. Çagalary goramagyň halkara gününiň yzysüre başlanan bu möwsüm ýurdumyzda ösüp gelýän ýaş nesliň sagdyn, bilimli we kämil bolup ýetişmegi ugrunda döwlet derejesinde edilýän çäksiz aladalaryň nobatdaky aýdyň beýanyna öwrüldi.
Aşgabat şäher häkimliginiň «Mekan» köşgüniň öňündäki meýdançada mekdep okuwçylaryny Köpetdagyň gözel jülgesi Gökderedäki çagalar sagaldyş-dynç alyş merkezlerine ugratmak dabarasy uly ruhubelentlige beslendi. Bagtyýar çagalar ajaýyp sazlaryň owazy astynda bezemen awtobuslarda Gökderä tarap rowana boldular. Ýeri gelende bellesek, bu ýerde ýurdumyzyň Bilim ministrligi tarapyndan taýýarlanylan ýörite maksatnama laýyklykda, çagalaryň dynç alşyny guramak, dürli gezelençleri, sport ýaryşlaryny we döredijilik bäsleşiklerini geçirmek ýokary derejede meýilleşdirildi. Döwrebap merkezlerde oýun meýdançalary, tans zallary, kompýuter otaglary, el iş gurnaklary we kitaphanalar çagalaryň hyzmatynda bolar.
Tomusky möwsümiň ilkinji günleri ýurdumyzyň ähli welaýatlarynda hem uly guramaçylyk we joşgun bilen garşylanyldy. Mekdep okuwçylary Änew şäherindäki «Buýsanç» çagalar medeni-dynç alyş seýilgähine, Kaka etrap merkezindäki medeniýet öýüniň öňündäki toý meýdançasyna ýygnandylar. Çagalar bu ýerden Gökderedäki «Bagtyýar nesiller» hem-de Kaka etrabyndaky «Ýaşyl ýaýla» çagalar sagaldyş-dynç alyş merkezlerine ugradyldy. Üç tapgyrda dowam etjek dynç alyş möwsüminde welaýat boýunça her tapgyrda 300 çaga dynç alar. Şeýle hem Hazaryň kenaryndaky «Ahal» sagaldyş merkezinde çagalaryň onlarçasy wagtyny peýdaly geçirer.
Özboluşly baýramçylygy ýada salýan dabaralar Balkanabat şäherindäki welaýat kitaphanasynyň öňünde giň gerimde ýaýbaňlandyryldy. Çagalar welaýat Taryhy we ülkäni öwreniş muzeýine gezelenç etdiler. Möwsümiň 1-nji tapgyrynda welaýat boýunça jemi 2 müň 80 çaga dynç alar. Olaryň 1 müň 380-si «Awaza» milli syýahatçylyk zolagyndaky merkezlerde, beýleki bölegi bolsa Gyzylarbat şäherindäki «Dürdäne» we «Gara altyn» çagalar sagaldyş-dynç alyş merkezlerinde kabul edildi. Şeýle hem ýurdumyzyň dürli sebitlerinden gelip, Hazaryň ajaýyp kenarynda dynç aljak çagalar Türkmenbaşy şäheriniň demir ýol we howa menzillerinde milli däp-dessurlarymyz boýunça garşylanyldy.
Demirgazyk sebitde «Salam, tomus!» diýen görkana ýazgyly awtobuslar «Bagtyýar nesil» çagalar sagaldyş-dynç alyş merkezinde düşlediler. Bu ýerde 3 tapgyrda jemi 900 çaga dynç alar. Şeýle hem welaýatyň çagalarynyň 50-si gözel Awazadaky «Daşoguz» çagalar sagaldyş-dynç alyş hem-de gözel Gökdere jülgesindäki merkezlere ýollanma aldylar.
Lebaply okuwçylar Awazadaky «Daýanç» we «Lebap» çagalar sagaldyş-dynç alyş merkezlerine, şeýle hem Gökdere jülgesine dabaraly ýagdaýda ugradyldy. Mundan başga-da, Amyderýanyň kenaryndaky ertekiler dünýäsini ýada salýan «Bagtyýarlyk» çagalar sagaldyş-dynç alyş merkezinde möwsümiň dowamynda çagalaryň 900-si kabul ediler. Merkezde çagalaryň iýmit tagamnamasy lukmanlar bilen maslahatlaşylyp düzülip, naharlaryň hiline we arassaçylyga aýratyn gözegçilik edilýär.
Mary welaýat Baş bilim müdirliginiň meýilnamasyna laýyklykda, döwrebap «Arkadagyň bagtyýar nesilleri», Awazadaky «Mary», Gökderedäki «Beýik Serdar nesilleri» çagalar sagaldyş-dynç alyş merkezlerinde çagalar üç tapgyrda dynç alarlar. Tomusky dynç alşyň dowamynda çagalar üçin welaýat Taryhy we ülkäni öwreniş muzeýine, gadymy ýadygärliklere we kitaphanalara syýahatlar meýilleşdirildi.
Çagalary doly derejede dynç almak üçin ähli şertler döredilen sagaldyş merkezleriniň binalaryna ýerleşdirdiler. Olarda ýaş nesliň wagtyny gyzykly we peýdaly geçirmekleri üçin ähli zerur şertler döredilendir. Döwlet Baştutanymyzyň tabşyrygy boýunça Türkmenistanyň Bilim, Medeniýet, Saglygy goraýyş we derman senagaty ministrlikleriniň, Bedenterbiýe we sport baradaky döwlet komitetiniň, jemgyýetçilik guramalarynyň hünärmenleri çagalaryň tomusky dynç alşyny guramaga hemmetaraplaýyn taýýarlyk gördüler. Bilelikdäki tagallalar esasynda dynç alyş merkezlerinde her ýyl tomus möwsüminde dürli ýaşly çagalara niýetlenen köp sanly bäsleşikler, sungat ýoluna ýaňy gadam basan artistleriň we çagalar çeper höwesjeň toparlarynyň, döwlet hem-de halkara derejedäki dürli döredijilik bäsleşikleriniň ýeňijileriniň, meşhur estrada aýdymçylarynyň, sazandalaryň gatnaşmaklarynda sport ýaryşlary, spartakiadalar, sahna çykyşlary, çeper okaýyşlar guralýar. Umuman, merkezlerde geçjek her bir gün çagalar üçin ýatdan çykmajak pursatlara baý bolar. Munuň özi ýaş nesilleriň şadyýan dynç almaklary bilen birlikde, olaryň Watana bolan söýgüsiniň artmagyna hem-de dünýägaraýşynyň giňemegine oňyn täsirini ýetirer. Çünki hormatly Prezidentimiziň hem belleýşi ýaly, ýurdumyzda çagalar aýratyn üns we gyzgyn mähir bilen gurşalyp alynýar.
«TÜRKMENISTAN»