1 — 7-nji iýun aralygynda Özbegistan Respublikasynyň Daşkent şäherinde Al-Horezmi adyndaky IV halkara matematika we informatika olimpiadasy geçirildi. Oňa ýurdumyzyň mekdep okuwçylary hem gatnaşyp, 2 altyn, 3 kümüş hem-de 1 bürünç medal gazandylar.
Zehinli mekdep okuwçylarynyň halkara ders olimpiadasynda ýurdumyza mynasyp wekilçilik etmegi tamamlanan okuw ýylynda gazanylan üstünlikleriň üstüni ýetirdi. Dünýä ylmyna “algebra” we “algoritm” sözlerini girizip, takyk ylymlaryň binýadyny goýan orta asyr Gündogar alymy Al-Horezminiň adyny göterýän halkara olimpiada dünýäniň 14 ýurdundan 220-den gowrak mekdep okuwçysy gatnaşdy.
Halkara olimpiada algebra we informatika dersleri boýunça iki tapgyrda, aýratynlykda geçirildi. Oňa gatnaşyjylara her tapgyrda dört ýumuş berildi. Olaryň jemleri boýunça degişli derslerden iň zehinli ýaşlar kesgitlenildi. Olimpiadada matematika dersinden Aşgabat şäherindäki iňlis dili, himiýa we biologiýa derslerini çuňlaşdyryp öwredýän ýöriteleşdirilen 86-njy orta mekdebiň 9-njy synp okuwçylary Serdar Nazaröwezow hem-de Akmyrat Akmyradow iň ýokary görkezijileri gazanyp, altyn medallara mynasyp boldular. Paýtagtymyzdaky dil derslerini çuňlaşdyryp öwredýän ýöriteleşdirilen 87-nji orta mekdebiň 9-njy synp okuwçysy Azat Nepesow, şeýle hem dil derslerini çuňlaşdyryp öwredýän ýöriteleşdirilen 97-nji orta mekdebiň 9-njy synp okuwçysy Ahmet Allaberenow kümüş medallary gazandylar.
Ýurdumyzyň mekdep okuwçylary informatika dersi boýunça geçirilen bäsleşikde kümüş we bürünç medallara mynasyp boldular. Has takygy, bu üstünlikler Aşgabat şäherindäki iňlis dilini çuňlaşdyryp öwredýän ýöriteleşdirilen 135-nji orta mekdebiň 9-njy synp okuwçysy Arslan Ýaňybaýewe hem-de paýtagtymyzdaky iňlis dili, himiýa we biologiýa derslerini çuňlaşdyryp öwredýän ýöriteleşdirilen 86-njy orta mekdebiň 9-njy synp okuwçysy Mähriban Baýramowa degişlidir.
Gahryman Arkadagymyzyň başyny başlan bilim özgertmeleriniň häzirki döwürde hormatly Prezidentimiziň baştutanlygynda üstünlikli dowam etdirilmegi netijesinde, ýurdumyzyň umumybilim berýän mekdeplerinde okuw derslerini ýokary derejede öwretmek, okuwçylaryň tebigy ukyp-başarnyklaryny ösdürmek, giň dünýägaraýyşly ýaşlary kemala getirmek, olary ylym we döredijilik bilen işjeň meşgullanmaga höweslendirmek hem-de hünäre ugrukdyrmak babatda toplumlaýyn işler amala aşyrylýar. Ýaşlaryň halkara ders bäsleşiklerinde ýurdumyza mynasyp wekilçilik etmekleri üçin hem ähli şertler döredilýär. Ýurdumyzyň mekdep okuwçylarynyň Al-Horezmi adyndaky IV halkara matematika we informatika olimpiadasynda baýrakly orunlara eýe bolmaklary ýaş nesil baradaky yzygiderli aladalaryň ýene bir ajaýyp miwesidir.
Begli ABDYKADYROW.
«Türkmenistan».